سلام المسيح معكم نبي نحكي اختباري لكل هلي و نقول لكم كيف عرفت و اخترت و أمنت و اتبعت المسيح قصتي بدت من امتا لما كان عمري 8 سنوات ماكنتش نصدق في الكلام اللي يقولو فيه ليا هلي الا في المدرسة عن الله ودين بشكل عام لان كل كلامهم ارهاب و تخويف “ربي يحرقك في نار، ربي يقطعلك يدك، ربي يكره النساء لانهن يتبعن في الشيطان..” و كنت نقول لي ماما انا نكره ربي لانه ما يحبنيش، فتضربني ماما، فنزيد مرة اخري ونقول “انا نبي نقتل ربي بالسيف” تزيد تضربني.مرة اخري في مدرسة يدرسو فينا مادة التربية الاسلامية ويحكولنا علي النبي محمد وصحابة وعلي قتل و تقطيع (الكفار) والغزوات و الارهاب تخيلو كل هذا ونحنا اطفال صغار!!! غزوة بدر و غزوة الخندق والاحزاب، انا قعدت نخاف من مادة التربية الاسلامية ومن “ابلات” معلمات المادة، ولاحظت ان اغلب “أبلات” معلمات مادة الدين يكونوا ملتزمات وواعرات ويخوفوا.مرة يشرحولنا علي درس اداب الزيارة قلتنا “ابلة” اسمعو يا اطفال الرسول شن دار مع واحد خش لحوشه بدون مايدق ؟ قالت ضربه بلوحه او حاجة تانية مش متذكرة في عينة نين قعد اعور معش يحق من عينه!! انا انصدمت روحت للحوش قلتها لي ماما شوي قالتلي شن هالكلام هذا مستحيل الرسول يدير هكي، بعدها قرت الكتاب تربية اسلامية وراجعت كتاب فقه عندنا في حوش لقتها فيه صح ، شوي قالتلي عادي عنده حق رسول، قتلها كيف هو رسول الله و يعور حد يعميله عينة قالت ماقاله حد ما يستأذن.و تكررت مواضيع تانية و نصدمت اكثر وصدمتي كانت كبيرة لما عرفت ان الرسول تزوج طفلة عمرها 9سنوات وماما قالتلي انه تزوجها وهيا كانت تلعب لما شافها ونزل عليه الوحي وقاله تزوجها وحتي في مدرسة يشرحو فيها لنا ويقولو مفروض بنت تزوج من عمر9 سنوات ولبسوني حجاب غصبن عني وانا ماكنتش نحبه ولا نبي نلبسه قالولي لازم تلبسيه، لبسوه ليا بالضرب لان الله ورسوله أمرو به انا كرهت الدين، كرهت الله ورسوله. هذا من غير التعنيف اللي تعرضت ليه من بابا وماما بابا انسان مخيف جداً، يضرب في ماما قدامنا ومن وقت نحن أطفال مازلنا ماقرينا، انا مش ناسيه ديما قدام عيوني وماما كانت تضربني انا ، وماتحبنيش كانت تقولي انا نتمني اني لوجبت عيل مش انتي، قالت كنت نحساب روحي نجيب عيل لكن طلعتي انتي بنت كرهتني وحني هيا اللي قعدت تهتم بيا حتي قالتلي انها مارضعتنيش انا كرهت ربي لانه يكرهني وعطاني حياة شينة، وعطاني هل ماينفعو، مايحبوني. كنت ديما نقول يارب ساعدني لكن هو ماسعدنيش عشان هكي عرفت ان مفيش ربي.هذا كله كذب في كذب وخاصة لما تعرضت للتحرش جنسي من ولد عمتي ومن خالي ولما قلت لي ماما هزبتني وقالتلي انتي تتخايلي بس، وقالتلي كان يعلمها باتك يقتلك!! فانا اقتنعت ان لو في الله حي راه ساعدني وحماني..خلاص انا أقتنعت ان مفيش حاجة اسمها الله، خاصة ان لما نقرأ قران يضايق صدري وحتي ماكنتش عارفه ان هذا اسمه إلحاد. مرة قلت لاختي انت مصدقة ان كان في حق رسول وصحابة؟ من لي حقهم وشن هو الدليل ؟ مشت اختي قالتها لي ماما جت ماما وضربتني وقالتلي نسمعك تقوليها اخري تانية نقولها لباتك يشنقك قالتلي انت تبي تقعدي كيف الملحدين شوي انا تذكرت ديما علي النت يحكو علي الملحدين شوي درت بحث علي الملحدين والالحاد وقعدت نتابع علي يوتيوب مقاطع للملحدين ونقراء علي منشورات عن جمعية الشباب ملحدين خلاص عرفت ان انا ملحده وقعدت ملحده حسيت اني تحديت هلي ودين الارهاب، لكن ماتريحتش بكل، حسيت روحي ضايعة وحياة بلا معني والاكتئاب بدى يزيد عن قبل، وخاصة مع ضغوط هلي علي وضربهم ليا عشان يبوني نمشي للجامع ونحفظ القران و يبوني نصلي زيهم و وليش مانوض عشان نصلي الفجر، لدرجة ان ماما وبابا قالو ان اني فيا سحر، وجابو لحوشنا شيخ جامع اللي في جنبنا هو صديق بابا وقعد يقرا عليا ويضرب فيا
لين انا طحت علي راسي وأغمي عليا من الضرب وقعدت ننزف وخذوني للمستشفي وقالو اني طحت في حمام. خلاص انا كرهت روحي وتواصلت حتي مع “منظمة حقوق الانسان في ليبيا ” كنت نبي حد نحكي معه.مرة كنت قاعده علي الفيسبوك طلعلي اعلان عن صفحة حب ليبيا كان المنشور عن بداية الخلق وكيف خلق الله ادم وحواء، قريت الموضوع بعدها خشيت عاصفحة قلت يه هذه علي المسيح!! وطلعت وفتت بعدها شوي فكرت قلت عليش رقالي ما أنا اصلا ملحده مش مسلمه فعادي شن فيها كام تابعت صفحة مسيحية شن يبي يصيرلي؟ خاصة محد يشوف فيا رجعت ودرت اعجاب للصفحة، وقعدت كل يوم نخش للفيسبوك نلقا منشور منكم وتميت نتابع في المقاطع، ونقرا في المنشورات كل مانقرا ونسمع فيديو نتريح للكلام، نقول هذا كلام من الواقع و منطقي وخاصة فيديوهات دكتور سام وأسلام كل كلمة فيها هي حقيقة عن الاسلام وشفتها بعيني قلت خلاص انا لازم نراسلهم ونتعرف اكثر علي الدين المسيحي ولو ماقتنعتش به مش حنخسر شي ، انا أساسا ملحده حكيت مع ادمن الصفحة وشرحلي و من البداية أرتحت و شعرت بفرح وقلبي صدق الكلام اللي قالوه لي وبعدها قاللي جربي صلي وعلمني كيف نصلي و قلي اطلبي من الله وقوليا يا بابا وقاللي مش مهم الطريقة المهم تواصلي مع الله و تكلمي معاه فعلا خشيت للدار في ليل وصكرت بامفتاح وقعدت نصلي نفس ماقاللي و زي مافي المسلسلات والافلام الاجنبية للي شفتهن نجلس علي ركبتي ويدي وجها لي وجه وقتله “يايسوع يابابا ساعدني ماتسيبني بروحي، انا ضعت كان انت حق دلني عليك ياربي” وبعدها تريحت ورقدت ووعيت في صبح وهانا مرتاحه وحاسه بفرحه كبير، بعدها يوم تاني حسيت روحي مضايقة وخايفة حد يكشفني و زي ضايعة. قلت خلاص عليش انتعب في روحي مرة ننفضح ونا نصلي أصلا دين مسيحي كذبة وأسطورة كيف الأسلام اصلا انا ملحده وهذا قرار صح نذكرها هذاك اليوم رقدت وماصليتش نفس امس في ليل. حلمت بشخص كان نفس النور قالي ماتخفيش انا حنجيك ونمشي بيك لبر الامان انا طريق الحق والصواب إياك أن تظلي عن طريقي انا كلمة الاله في الارض كررها اكثر من مرة، و مدلي ايده ومشيت معاه وحسيت بالامان في جنه خضراء مزينة بالورود تشع كلها نور و فرحشكرا ليك يا الهي اللي ما تركتنيش و عطيتني حياة جديدة الحمدالله علي نعمة الرب يسوع االمسيح المعظم.اختكم بنت الملك
